【網上配對】付錢邂逅 約會3次見家長:唔想阿媽覺得我俾人呃

撰文:黃漢兒
出版:更新:

單身,未必因為妳不夠好,只是緣份還未牽引你們遇上。茫茫人海之中,妳可能每天都跟妳的Perfect Match擦身而過。有時候,基於各種外在因素的阻撓,可能是生活圈子太窄,又可能是沒有時間,而妳需要的是外來的力量輔助。
交友App、Speed Dating公司,妳一聽到這些名,就以為一定是走到「窮途末路」的男女才會參加?這次故事中的主角Cindy和Todd,大方跟大家分享網上覓真愛的經歷。無錯,另一半是網上認識的,又如何?

網上結緣的Cindy和Todd。(張浩霖攝)
「收工返到屋企, 阿媽會話:『咦,阿仔返嚟啦?又一個人返嘅? 』」
Todd

29歲的Todd,拍過4次拖,自言年少時未曾使用過交友App。他說三年多前開展LED公司之後,生活圈子只剩下以男性居多的同事和經商的老闆們。「生活模式轉變咗,以前讀書多時間玩,或者同朋友玩會認識到異性,但踏入社會之後,多咗應酬,攰到返屋企就瞓,第二朝繼續工作,好難抽時間識女仔。」自豪男人就算年過三十亦不會有壓力,只是偶爾會聽到一兩句從媽媽而來的「提醒」。「收工返到屋企, 阿媽會話:『咦,阿仔返嚟啦?又一個人返嘅? 』我會話:『係啊,近排忙少少 。』」強調「唔係特別想拍拖」的Todd,剛好在Facebook上看到一個挺有趣的心理測驗,以為是九型人格測驗,一做就做了45分鐘,之後發現「好似有啲唔對路喎,又留E-mail又留電話」。第二日,就收到配對公司的電話......

Todd強調自己「唔係特別想拍拖」。(張浩霖攝)

相比Todd,24歲的Cindy交友經驗算是非常豐富,各種交友app、大學的聯誼活動、Speed Dating,她都試過。但她認為大學時期的男同學都比較幼稚,而Speed Dating這件事又太速食,聊天三分鐘左右就交換電話 。Cindy過往的三次戀愛當中,要不就從朋友日久生情,要不就是做義工認識。雖然她自言異性緣不差,會付錢找配對中介,除了自覺生活圈子太窄,原來更是因不忿前度比自己早「出Pool」。「之前做補習社加私補,同事嚟嚟去去都係嗰幾個,我自己又唔會出去玩。」至於因性格不合而分手的前度,「點解分手之後咁快就搵到第二個?好唔甘心, 無理由佢咁衰都搵到,點解我會未搵到㗎?!所以就試唔同方法去識人。 」開始時每星期都跟新朋友約會吃飯,她笑言「完全唔記得邊個打邊個 」,直至收到Todd的邀請...... 

第一次約會 決定權留給女方

Todd記得,在三頁「合資格女士 」中,最合心水的正是Cindy。但當他發出邀請後的兩天,她都沒有回覆。他形容為「吊我癮」,因為另外兩位在隔天已經有回覆。一個假日的下午,在中介安排的西式餐廳,早到的Todd特意選了一個遠離冷氣的位置,靜待Cindy的來臨。「餘光見到有個女仔喺門口猶豫,距離好遠唔肯定係唔係佢,我有揮手但佢應該睇唔到。第一眼感覺清純樸素,無大濃妝,老師look好斯文,感覺好隨和。」他形容。而Cindy的第一感覺:「自己係好相信直覺嘅人,心諗呢個男仔都有機會可以發展。」他在旁插話:「留意返,只係有機會!」這頓飯,他們足足聊了兩小時。

訪問期間,體貼的Todd怕Cindy會冷,就主動關風扇。見女友喝熱茶,就說:「睇熱啊!」貼心程度是我看過的男生中數一數二。(張浩霖攝)

Todd約會前預先做好功課,準備一些較「年輕」的話題,卻發現Cindy「雖然年輕,但思想大幾年」。Cindy對Todd印象是個細心體貼的人,又怕自己吃不飽、不夠暖。那夜,他沒有主動抄牌,相反給她一張卡片,將決定權交由她手上。凌晨時分,她傳給他一個信息。三天之後,他們再次約會。Cindy笑言自己愛靚仔:「佢嗰日公司要開會,著咗Full Suit ,然之後我就心花怒放。」

見家長 才算確定關係

問起二人認識多久在一起,他們支支吾吾笑而不語。Todd見女友略顯尷尬後搶答:「等我講啦!Keep住都有contact嘅,其實都算快,我哋10月認識,10月就一齊咗。」現今世代,三星期真的算不上快,一天就在一起我也聽過,還恩愛地相處三年呢。確認彼此關係的一刻,應該是Todd帶Cindy見家長之後。「吓,嗰時未一齊咩 ?我以為見家長已經一齊咗。」Cindy驚訝。「妳聽我講埋先......」Todd細心解釋。「第三次見面就帶咗佢返屋企,本身喺想畀佢睇吓自己住嘅地方,亦有預先同屋企人講會帶朋友上嚟。」爸爸看到Cindy,嘴角就不自覺上揚。當時不在家的媽媽卻說:「唔算數喎!嗰次我唔喺度,搵日上嚟食飯畀我見吓!」直至第四次約會時,Cindy帶Todd見她父母,Todd認為這才是正式確認男女朋友的關係。沒想到,童顏的外表下,仍藏著傳統的思想。

Cindy參加Speed Dating時最常聽到:「你喺全個網最細個嚟㗎。咁細個都會Join?」(張浩霖攝)

網上的霧水情緣有很多,想開花結果卻可能要用多次失敗換來。Cindy亦分享了過往經交友App和Speed Dating的失敗和深刻經歷,她曾經遇上相片與真人不符的「禿頭男」、傳銷人士、更在Speed Dating上試過「得三分鐘時間傾,之後swap。但對方故意去洗手間,就係唔想同我講嘢。」經驗豐富的她也直言,「Speed Dating 有時會有媒,有啲靚啲嘅可能係請返嚟 ,Stand喺度畀人睇吓,會有車馬費。通常男仔少啲,女生會多啲。」她有點不好意思地向我們坦白:「我其實有試過做媒,當時有男朋友,做Speed Dating公司嘅朋友話好緊急,有女仔甩底。咁有錢收,當食餐飯,就去咗幫手。」

先講條件再談戀愛 就係咁現實

配對公司大都會因應參加者不同的要求進行篩選,例如年紀、吸煙與否、是否想要小孩。Cindy坦言當初直接打給顧問,希望對象身高有175cm以上,而Todd的心水職業是教師,因為「諗長遠啲,結婚之後對小朋友Education都好啲,起碼老婆識教。」怕不怕對方看外在條件勝於內在?Cindy明言:「我覺得香港就係咁現實,講真,我相信貧賤夫妻百事哀。當你好鍾意一個人,但雙方無穩定嘅經濟基礎,硬係要一齊,都會有好多爭執。但又唔好講到好似盲婚啞嫁咁,只係篩選咗你想要的條件。」對於有樓有學識的Cindy,情願在條件上平衡了,再談情說愛。Todd則表示:「等大家都有個底牌先,摸索吓了解吓對方嘅一切。唔似你讀書時候,對方鍾意排球,你就盲中中加入排球隊去接近對方。」的確,「配對」為現代人節省了不少時間。

「經過時間了解之後,其實點樣識都已經唔重要。」
Cindy
二人現時同居,對於將來的計劃亦有共識。(張浩霖攝)

透過網上配對撮合的情緣,但不少人還是覺得不好意思大方承認,尤其是家人。大膽接受訪問的Cindy竟仍未向家人坦白:「對老一輩嚟講,唔好話上網識人,上網開信用卡都好危險㗎嘛。後生嘅話如果知道佢有上網識人,最多講句小心啲。因為經過時間了解之後,其實點樣識都已經唔重要 。」至於Todd就用行動證明一切:「我媽媽比較單純,佢睇完啲新聞,就assume上網識人有九成都呃人,『 啊,我個仔俾人呃咗』。所以我換個方式,最直接就喺帶Cindy返屋企見面,直接溝通比一切都真實,好過你一開頭就話上網識嘅。」

跟據中介對二人的愛情觀、家庭觀、 金錢觀等分析出的「匹配度」,Cindy和Todd高達92分,他們也不約而同表示對對方有種相識很久的感覺,「拍咁多次拖,無嗌過交係第一次,得佢俾我話。」Cindy笑言。Todd鬼馬回應:「當唔係嗌交㗎啦。」然後像賣廣告般分享:「喺前所未有嘅感覺,好似識咗好耐咁,融合速度亦都好快。」當然,他們的例子可能只是少數。

說到底,「網上配對」只是一個邂逅途徑,能不能走下去是靠二人造化。